|
The Cinemas Lanza Su Nueva Super Card |
|
|
ORANJESTAD, Aruba – 3 di Augustus, 2008: “E ta un forma pa nos gradici nos clientenan y honra nan lealtad na nos” asina Richard de Veer, encarga cu maneho di The Cinemas na Aruba a cuminsa bisando. E gerente di The Cinemas a anuncia nan “Super Card” specialmente pa amantenan di cine. Esaki a sosode durante un evento diasabra ultimo dilanti The Cinemas at Renaissance Marketplace.
No tabata mucho tempo pasa cu MetaCorp, e compania madre di The Cinemas a haci un inversion cuantioso cu 6 sala nobo na Paseo Herencia Mall. Cu esaki, Aruba awor tin 13 screen di pelicula. Cu e inversion grandi aki, amantenan di cine awor tin mas opcion ora nan kier mira un bon pelicula. “Nos ta contento di anuncia cu for di dia nos a habri e salanan nobo, cu e mercado di cine a crece mas ainda. Nos ta orguyoso di por a trece mas hende pa The Cinemas, y pesey awor nos kier honra nan lealtad y sosten”, di acuerdo cu Richard “Turi” de Veer. “Ta for di basta tempo caba nos ta trahando riba e producto aki y finalmente nos ta cla pa presente na comunidad. E ta un carchi cu ta premia lealtad di nos clientenan, specialmente e amantenan fiel di cine” asina de Veer a splica durante e encuentro cu prensa. Tur hende awor por inscribi pa bira miembro di The Cinemas cu nan “Super Card”. Esaki ta un carchi riba nomber di e cliente cu e lo mester “swipe” cada bez cu e cumpra un entrada pa The Cinemas, na cualkier un di nan. Cada bez cu e pasa e carchi, e ta bay ta acumulando puntonan cu e por intercambia pa productonan den The Cinemas manera popcorn, Coca Cola, sandwich y mas. Fuera di productonan, e miembro lo por intercambia su puntonan pa carchinan di entrada tambe. Pa esnan cu a probecha y a inscribi diasabra ultimo riba e prome dia, a ricibi un total di 20 punto adicional. “Corda bon cu e carchi aki ta gratis. Djis Bo mester aplica pe na The Cinemas at Renaissance Marketplace of na The Cinemas at Paseo y bo por cuminsa spar punto. E idea ta pa Bo spar mas punto posibel cu na caminda lo beneficia Bo den forma di entradanan gratis, productonan, etc. Den futuro nos lo haci mas campaña tambe, pues ta pidi tur hende pa keda pendiente” asina Richard de Veer a termina bisando. MetaCorp a inicia den e industria di cine na Aruba na aña 1920 tempo cu tabatin menos di 10 mil habitante. E industria aki a pasa den temponan bon y menos bon, pero semper a sigui padilanti. Tempo cu television color, combina cu negoshinan di huur pelicula a bini na moda y na final hasta Satelite Dish y Cable TV a haci nan entrada, tur a influencia e negoshi di cinemas. Asina mes, a percura pa inversionnan grandi pa hiba e industria aki na e siguiente nivel, cu mas sala, salanan di cine mas luhoso y un sistema di screen, video y sonido cu nos so tin den e region aki. Awor cu e sistema di spar punto pa honra e fiel clientenan di The Cinemas, e compania ta spera di por sigui crece e mercado di esnan cu ta prefera di sinta den un lugar bunita y mira un bon pelicula.
Esnan cu kier mas informacion por bishita e website www.thecinemas.aw
|
