|
New India 'Pega Smart, Gana Smart' |
|
|
|
 ORANJESTAD – Durante un conferencia di prensa New India Assurance a anuncia inicio official di ‘Pega Smart, Gana Smart!’, un campaña cu cual e empresa di seguro ta regala hopi premio na comunidad di Aruba pa bisa danki pa 45 aña di confianza den e servicio y estabilidad di e empresa.
Durante e celebracion den showroom di Topcar na unda New India Assurance a conmemora 45 aña di existencia na Aruba, Sra. Joy Raghunath, Directora di New India Assurance a presenta un arcoiris di sorpresa pa tur hende den nos comunidad. Producto nobo, servicio nobo y un campaña cu ta dura te cu fin di aña. Segun palabranan di Joy Raghunath: “New India Assurance Aruba ta existi 45 aña paso nos pueblo ta confia den nos. Danki pueblo di Aruba p’e confiansa den e promesa cu nos ta haci pa salbarguardia bo proteccion cu cada seguro cu nos sera. Danki na tur cliente, grandi y chiquito pa ta parti di the art of being smart TM.” Sra. Raghunath a continua bisando: “Nos mester a tuma accion pa por a enfatisa nos danki, pesey nos a scohe pa ofrece nos comunidad un arcoiris di regalo.” Den esey el a referi pues na New India Assurance su liña nobo di tres producto Smart Economy, tambe tres servicio nobo ; dos website y road service pa sirbi comunidad di Aruba miho y tambe e campaña Pega Smart Gana Smart. For di awor te cu fin di ana, lo tin un Smart Sticker Team ta core ront Aruba pa ofrece pa pega sticker riba bentana patras di bo vehiculo y esun cu Pega Smart tin chens di Gana Smart. Tin premio semanal manera celular di Setar, certificado di Texas, T.G.I. Fridays, Sparetime, Membrecia di Gym di La Cabana y premio mensual manera weekend stay di Aruba Marriott Resort y Aruba Renaissance Resort. Tambe Valero y varios otro empresa mas a uni den e celebracion di 45aña di existencia di New India Assurance y pa fin di aña ta rifa un Yamaha Scooter, un Yamaha Quad Racer y e Nissan Tiida nobo di color plata cu ta para riba e plataforma na Topcar. Participacion na e campaña ta masha facil. E Smart Sticker Team ta pasa ofrece sticker y flyer den tur skina di Aruba y tambe por busca sticker cu flyer na oficina di New India Assurance y stacionnan di Valero. Mester djis pega e Smart Sticker riba bentana patras di bo auto y e Smart Team ta saca portret tur caminda pa despues pone den e Smart Box na New India pa e rifa semanal y mensual por tuma luga. Participantenan mag saca portret nan mes tambe di nan auto cu e sticker pega riba e ventana patras pa bin deposita e portret den e Smart Box na New India Assurance. Prome cu sorteo ta controla cu no tin mas cu un portret pa cada vehicuo den e Smart Box pa por tene e proceso di e sorteo fair. Importante ta pa e ganador tin e flyer cu e reglanan di participacion pa por reclama e premio. Parti dinamico di e campaña ta e Smart Van cu e hobennan di e Smart Sticker Team cu ta core ront Aruba toca e jingle di Pega Smart Gana Smart cu Wally Warning a compone riba musica original di su piesa No Monkey cual ta masha popular riba youtube.com, specialmente bou di hubentud kende ta gusta mensahenan progresivo y alegre di Wally masha hopi mes. Cu esaki New India Assurance ta spera di a crea un jingle cu ta pega di tal forma cu tur hende ta cant’e y bali’e di biaha y tambe pa duna aporte na Wally Warning, un artista Arubiano hopi exitoso na Alemania, cu ta saca cara di nos isla cu proyectonan grandi na Africa tambe. Pa clausura e parti oficial Sra. Raghunath a desea tur hende exito cu ganamento di premio pa despues Liesbel Pop y tres bailarina mas a entretene publico cu un baile dinamico riba e jingle di Pega Smart Gana Smart. Ivan Kelie jr. a haci un tremendo trabou como maestro di ceremonia y Etty Toppenberg a zorg pa ambiente di su forma unico y sumamente crioyo riba tononan caluroso di su musica sin igual.
|
