|
Teotje Cafe Gano La Competencia De Torta De Digicel |
|
|
ORANJESTAD, Aruba – 15 di Juli, 2008: E cantidad di hende cu a atende e evento di Digicel ayera a kibra tur espectativa. Un publico grandi a bay purba e bolonan cu mas di 35 participante a traha, entrenan afficionadonan y hasta panaderianan.
E huradonan, forma pa un artista, un chef y gerencia di Digicel tabatin un trabou pisa pa scoge cua bolo ta pas mas cu e celebracion di 5 aña di e compania cu mas ta creciendo na Aruba, Antiyas, den caribe y te hasta awor den Centro America. Mester menciona cu tur e participantenan a ricibi un saco cu cantidad di regalo di Digicel aden como muestra di aprecio pa nan tempo y dedicacion den trahamento di e bolonan aki. Un total di 5 persona, cu ta Bright Bakery, Juan Krozendijk, Sonia Wever, Alecander Figaroa y famia Paalman a ricibi un celular regalo for di Digicel. Na di tres lugar a keda e bolo di Super Food cu a gana un premio di Afl. 250,-, sigui na di dos lugar pa e bolo di Jeffrey la Rosa cu a gana Afl. 500,- mientras cu e premio grandi di Afl. 1.000,- a bay pa Toetje Cafe. E ultimo aki a traha un bolo grandi parti den cuater, den cual a enfoca riba tur e detayenan di celebracion di 5 aña di Digicel, incluyendo un mapa di Caribe cu tur e mercadonan di Digicel den dje. “Eigenlijk tur e participantenan aki ta un ganador pasobra nan tur a briya cu nan creatividad”, asina Michelle Winklaar a bisa na final di e competencia. E ehecutivo di e compania cu awe ta di fiesta a yama e participantenan danki pa nan contribucion y sosten durante e ultimo 5 añanan.
|
